Ons Kerk

Agtergrond

Die NG Gemeente Franschhoek bestaan sedert 1843 en het sy wortels in die vestiging van die Franse Hugenote in die vallei in 1688. Die Hugenote Gedenkmuseum en die Hugenote Monument is op die dorp.

Daar is net een leraar in die gemeente, nadat prof Pieter Coertzen op 20 April 2008 as tweede leraar afgetree het.  Prof Coertzen was ’n dosent aan die Universiteit van Stellenbosch se Fakulteit Teologie, maar gekoppel aan die NG Gemeente Franschhoek. Daarbenewens beskik die gemeente oor ’n skriba, ’n koster, ’n skoonmaker en twee terreinwerkers. Die gemeente se orrelis is mev Felicity Grové. Die gemeente het twee begraafplase: een is die historiese kerkhof naby die kerkgebou en die ander een is naby die Hugenote Monument.  Dit word ook dikwels die “Hugenote Begraafplaas” genoem vanweë die groot aantal Hugenote wat daar begrawe is.

Die Kerkraad bestaan uit 14 wyke met 15 ouderlinge en 12 diakens.   Sommige is plaaswyke (pruime, pere, perskes, sitrus, wyndruiwe, olywe, Proteas, ensovoorts word verbou). Benewens die Kerkraad se onderskeie kommissies is daar nog die Vrouediens, kategese, jeug-aksies, kleuterkerk, ens.  Verskeie sel- en Bybelstudiegroepe bestaan in die gemeente. Gereelde wyksbyeenkomste word gehou.

Die kerkgebou, wat op ’n groot erf (2,5 hektaar) in die hoofstraat (Hugenoteweg) van Franschhoek staan, dateer uit 1847 en is in 1968 volledig gerestoureer.   Die kerkgebou het ’n tradisionele kruisvormige vloerplan met ’n rietdak maar geen kerktoring.  Die kerkgebou het ’n indrukwekkende binnekant en ’n goeie orrel.  Die kerkgebou beskik oor ’n klankstelsel en ’n geslote-kring TV wat onder andere die moederskamer en Fleur de Lis (die ACVV-tehuis vir bejaardes) bedien.   ’n Dataprojektor en afstandbeheerde skerm laat die predikers toe om beeldmateriaal te vertoon, sonder dat die kerk se besonderde binnekant met “moderne tegnologie” ontsier word.

Die huidige pastorie is ’n baie groot huis (600 vierkante meter) en dit dateer uit 1927. ’n Deel van die pastorie word (per kerkraadsbesluit) verhuur aan verdienstelike lidmate en tans ook aan damesstudente in die gasvryheidsbedryf.

Die gemeente beskik oor ’n moderne kerksaal wat ook die kerkkantoor en kategese-lokale huisves.

Die Franschhoek-vallei is ’n gesogte toeriste-bestemming geleë in die pragtige Bergriviervallei.  Die dorp is omring deur berge wat soms in die winter met ’n ligte sneeukleed bedek is. Die vallei is bekend vir sy uitmuntende wyn, vrugte en wêreldgehalte verblyf en restaurante. Landbou en toerisme is die hoof ekonomiese aktiwiteit van die streek. Franschhoek is sowat 30 km vanaf Paarl en Stellenbosch en sowat 70 km vanaf Kaapstad. Besoek gerus die toerismekantoor se webblad.  Daar is ook ’n alternatiewe webblad met goeie foto’s van Franschhoek beskikbaar.

Die bevolking van die dorp en landelike gebied in die grense van die gemeente was in 2006 sowat 16 000 mense. Soos in baie ander plattelandse NG gemeentes is daar ook in die Franschhoek-vallei opvallende veranderings in die demografie wat direk sowel as indirek ’n impak op die gemeente het.   In die laaste paar jaar was daar byvoorbeeld ’n instroming van werksoekers in die vallei, hoofsaaklik Xhosa-sprekend, met gevolglike woningnood, groeiende plakkerskampe en werkloosheid.  Die plaasarbeiders (veral bruinmense) het grotendeels van die plase na Franschhoek Noord (Groendal) verhuis. Vermoënde buitelanders het reeds die vallei “ontdek” en besit heelwat plaasgrond en dorpserwe.

Franschhoek beskik oor ’n aantal supermarkte (soos Pick n Pay), talle luukse winkeltjies, die vier groot handelsbanke, ’n klein biblioteek, ’n polisiekantoor, ’n poskantoor, ’n skool (Hoërskool Franschhoek), ’n privaatskool, Bridge House, die reeds vermelde Hugenote Gedenkmuseum, die Hugenote Monument  en natuurlik verskeie uitmuntende restaurante, wynplase en ’n groot verskeidenheid toeriste-akkommodasie.   Naweke is die dorp normaalweg vol toeriste; dan is die hoofstraat raserig en parkeerplek skaars.  Van tyd tot tyd word toerisme-gedrewe feeste – die bekende kaasfees, sjampanjefees, Bastille-fees en oesfeeste in en naby die dorp gehou.  Die munisipale struktuur setel in Stellenbosch, maar Franschhoek se vlag – die Franse driekleur met ’n grys olifant op die wit baan – wapper nog vryelik in die dorp.  Franschhoek spog tans met twee koerante wat maandeliks verskyn:  “Franschhoek Tatler”  en “The Month

Die NG Gemeente Franschhoek bestaan uit sowat 460 belydende lidmate en 100 dooplidmate.   Ongeveer  40% van die lidmate is ouer as 50 jaar maar die afgelope paar jaar was daar ’n verblydende groei in die aantal jong egpare, jong boere en werkende jongmense in die vallei.   Oor die afgelope paar dekades toon die gemeente ’n kwynende lidmaattal, maar dit lyk asof die lidmaattal nou gestabiliseer het.

Die finansiële gesondheid van die gemeente is bevredigend maar vereis nogtans  volgehoue aandag en vernuwende bestuur deur die kerkraad.

Geskikte groepbehuising vir selfversorgende bejaardes is ’n probleem in Franschhoek.   Die gemeente beskik oor een huis, Huis Fredagh, vir selfversorgende bejaardes, maar nog akkommodasie word beplan in samewerking met die plaaslike ACVV-tak.   Die ACVV bedryf ’n tehuis vir bejaardes (Fleur de Lis), wat langs die kerkgrond geleë is. Daar is noue samewerking tussen die gemeente en Fleur de Lis.

Die Franschhoek Hospice verrig belangrike werk onder die gemeenskap en daar is noue samewerking tussen die gemeente en die Franschhoek Hospice.   Daar word elke jaar ’n gesamentlike gedenkdiens in die NG kerkgebou gehou om almal in die distrik wat die voorafgaande jaar gesterf het, te gedenk. Hierdie diens, sowel as ’n spesiale diens vir toeriste met Kersfees, sommige begrafnisse en die meerderheid huweliksbevestigings vind in Engels plaas.

 

Leave a Reply

Your email address will not be published. Required fields are marked *

Van ons Facebook blad

  • Die gedenkdiens van Marlene Pretorius, Ma van Hendrik en Riana Pretorius, vind Saterdag oggend 10:00 hier by ons in die kerk plaas.

    January 15

  • Dit was Sondag n baie spesiale dag vir die Bester's . Peet, Ds. Alheit (Adrienne se pa) Lourens en klein Bernhardt saam by Lourens se bevestiging. Wat hierdie nog meer spesiaal maak is dat Adrienne se oupa ook in hierdie gemeente predikant was en dat haar ouma aan die Joubert kant vir 40jaar orrelis by hierdie gemeente was. Wat n storie, wat n getuienis oor jare. Lourens baie seen en voorspoed vir jou nuwe gemeente. Ons is trots om deel te vorm van hierdie reis.

    January 14

  • 360º GEE NOG ‘N TREE – VROEG IN 2019 Vir oulaas wens ek jou ‘n baie goeie 2019 toe. Met die dat die skole so vroeg vanjaar begin het, is ons sommer vroeg in die jaar besig. Dis nou as skoolkwartale jou lewe raak... Om iets vir iemand toe te wens is ‘n manier om ‘n daad in woorde te doen. Toegegee, ons gaan baie ligtelik hiermee om. Die verskil is of die wens werklik bedoel word. Daarom vra ek jou om die goeie wens vir 2019 te ontvang, neem dit in en bêre dit in jou hart, dis waar dit hoort. Ek weet nie hoe jy vaar met Nuwejaar voornemens nie. Ons het Sondag tyd spandeer met die volgende gedagte: “Wat sal jy vanjaar in die Here se Naam waag?” Ons leer die Godheid ken aan die Name wat Jesus byvoorbeeld het. “Jesus” beteken ‘verlosser’. Ander name is “Immanuel” wat ‘God met ons beteken’. In Fil.2:9-11 lees ons: “9Daarom het God Hom ook tot die hoogste eer verhef en Hom die Naam gegee wat bo elke naam is, 10sodat in die Naam van Jesus elkeen wat in die hemel en op die aarde en onder die aarde is, die knie sou buig, 11en elke tong sou erken: “Jesus Christus is Here!” tot eer van God die Vader.” Ek wil jou sommer opnuut uitdaag om meer goed vanjaar in hierdie Jesus se Naam aan te pak. Daar is krag en betekenis hierin. Voor hierdie Naam glo ons, gaan elke knie buig om te erken Hy is Here. Kom ons hou dit in gedagte in ons verwagtinge en doen en late vanjaar. Daar’s bekende aanhaling van William Carey wat dit treffend opsom: “Expect great things from God, attempt great things for God”. Verwag groot dinge omdat God, God is en waag in Sy Naam meer. Laaste sin: Hoekom sal God jou deel van Sy planne gemaak het? Waarskynlik omdat Hy jou eerstens lief het en toegerus het vir hierdie tyd. ‘n Mooi jaar vir jou in SY NAAM. Gaan jou wel Peet 0845833454 peet@ngkfranschhoek.co.za

    January 10

  • Ons wil almal 'n Geseënde Kersfees en 'n Voorspoedige 2019 toewens. Ons kantore sluit vandag en open weer op 3 Januarie. Die Kersdiens is Dinsdag 25 Desember om 09:00

    December 21

  • Kerswens uit Pastorie Hoe sal jy 2018 gradeer? Was dit ‘n goeie een? In ‘n geloofsgemeenskap of dorp sal al die beskikbare graderings gebruik kan word, van uiters goed na uiters sleg. Soos jou eie ervarings dalk uiteenlopend was, so ook ander s’n. Ons jaar het begin met ‘n droogte. Dag zero was ‘n swaard oor ons koppe. Ons het vroeg in die jaar ‘n nuwe president gekry. So kan ek goed opnoem. Reën en hael...Daar was ook die stories uit ons huise van vreugdes en swaarkry. Ekself het hierdie jaar uiteenlopend ervaar. As ek uit my eie hart en ervaring van die jaar vir jou ‘n Kersseisoen wens wil gee, sal ek dit doen met hierdie beeld: dat God langs die pad wag vir elkeen van ons. My wens is dat jy Hom sal herken, innooi en tyd saam sal spandeer. Ons gaan ‘n paar dae see toe en dan by oupa en ouma se kleinkind op die plaas kuier. Ek kom terug om die Kersdiens te hou. Waar jy ook al is in hierdie dae, wens ons jou die beste van die aller, aller, beste toe. Kyk uit Hy staan en wag langs die pad. Peet en Adrienne

    December 12

Kalender

January 2019
Monday Tuesday Wednesday Thursday Friday Saturday Sunday
December 31, 2018 January 1, 2019 January 2, 2019 January 3, 2019 January 4, 2019 January 5, 2019 January 6, 2019
January 7, 2019 January 8, 2019 January 9, 2019 January 10, 2019 January 11, 2019 January 12, 2019 January 13, 2019
January 14, 2019 January 15, 2019 January 16, 2019 January 17, 2019 January 18, 2019 January 19, 2019 January 20, 2019
January 21, 2019 January 22, 2019 January 23, 2019 January 24, 2019 January 25, 2019 January 26, 2019 January 27, 2019
January 28, 2019 January 29, 2019 January 30, 2019 January 31, 2019 February 1, 2019 February 2, 2019 February 3, 2019

Archives

wordpress stats plugin